भुकम्पको त्रास कम गर्न पूर्वका एघार ठाउँमा साँस्कृतिक कार्यक्रम

१२ जेठ, दमक।
भुकम्पको त्रास र प्रभाव कम गर्ने उद्देश्यका साथ नेपाल संगीत तथा नाट्य प्रतिष्ठानले पूर्वका तीन जिल्लामा साँस्कृतिक कार्यक्रम गर्ने भएको छ ।
१५ जेठमा मोरङको बेलबारीबाट शुरु हुने त्यस्तो कार्यक्रम २४ जेठमा इलामको फिक्कलमा पुगेर समापन गरिने प्रतिष्ठानका सदस्य-सचिव गणेश रसिकले जानकारी दिए।
झापाको दमकमा सोसम्बन्धी अन्तरकृया गर्न आएका रसिकले मानिसहरुलाई मनोरञ्जन दिँदै जीवनमा जाँगर भर्न मोरङ, झापा र इलामका ११ ठाउँमा साँस्कृतिक कार्यक्रम गर्न लागिएको बताए।
पूराना लोक गायक लक्ष्मी जोशीको आतिथ्यतामा भएको कार्यक्रममा प्रतिष्ठानका प्राज्ञ सदस्यहरु राम धामी, कोमल निरौला, प्राध्यापक भूमि दाहाल लगायतले मन्तब्य राखेका थिए।