ज्येष्ठ र शिक्षकलाई सम्मान, विद्यार्थीलाई पुरस्कार

विष्णु पौेडेल
३१ बैशाख, दमक।
झापाको माहाभारास्थित बालकल्याण माविमा शिक्षासेवी, पूर्व शिक्षक तथा सामाजिक अगुवा विश्वप्रसाद अधिकारीले स्थापना गरेको विश्वप्रसाद अधिकारी अक्षयकोषबाट सम्मान तथा पुरस्कार वितरण गरिएको छ । ज्येष्ठ नागरिक र शिक्षकहरुलाई सम्मान र सो क्षेत्रका विभिन्न तहका उत्कृष्ट विद्यार्थीहरुलाई हौसलास्वरुप पुरस्कार प्रदान गरिएको हो ।
अधिकारीले केही वर्षअघि स्थापना गरेको सो कोषबाट सोही विद्यालयमा लामो समयदेखि कार्यरत शिक्षकहरु भोलाप्रसाद खतिवडा, चन्द्रबहादुर खड्का र नारायण बहादुर कार्की सम्मानित भएका हुन् ।

त्यसैगरी बैगुन्धुराकी अछुतामाया न्यौपाने, कोरोबारीका डिल्लीराम लुँइटेल र महाभाराका मानबहादुर लिम्बूलाई ज्येष्ठ नागरिक सम्मान प्रदान गरिएको छ । उनीहरुलाई दोसल्लासहित सम्मान पत्रबाट सम्मान गरिएको छ । बुधबार बालकल्याण माविमा आयोजित कार्यक्रममा सो क्षेत्रका विद्यालयहरुका उत्कृष्ट विद्यार्थीहरुलाई पुरस्कार समेत प्रदान गरियो ।
पुरस्कृत हुनेहरुमा गत वर्षको कक्षा ८ को जिल्लास्तरीय परीक्षामा उत्कृष्ट हुने प्रशंसा पाण्डे, एसएलसीका उत्कृष्ट सनम अधिकारी, विनोद हेमरम लगायत पाँचजना छन् । उनीहरुलाई बैगुन्धुरा स्रोत केन्द्रका स्रोत व्यक्ति हरि अधिकारी, शैक्षिक तथा सामाजिक अगुवाहरु बृहस्पति उप्रेती, पर्शुराम काफ्ले लगायतले सम्मान गरेका थिए । विद्यालय व्यवस्थापन समितिका अध्यक्ष चन्द्रबहादुर राईको सभापतित्वमा भएको कार्यक्रममा शिक्षक भीमप्रसाद कोइरालाले कार्यक्रमको औचित्यमाथि प्रकाश पारेका थिए । अधिकारीले सो विद्यालयअन्तर्गत रहने गरी कोष स्थापना गरी आफ्नो स्वामित्वको १५ कठ्ठा जग्गाको स्वामित्वसमेत सो कोषमा हस्तान्तरण गरिसकेका छन् ।