मनोज लामिछाने
११ बैशाख, बिर्तामोड।
सीपमूलक तालिम पूरा गरी व्यवसाय सञ्चालन गर्ने तयारीमा रहेका प्रशिक्षार्थीहरुलाई बिर्तामोडस्थित झापा प्राविधिक शिक्षालयले शुक्रबार एक कार्यक्रमका बीच निःशुल्क औजार वितरण गरेको छ ।
रोजगार कोषको सचिवालय हेल्भटास नेपालको सहयोगमा झापा प्राविधिक शिक्षालयले सञ्चालन गरेको समृद्धिको बाटो कार्यक्रमअन्तर्गत असिस्टेन्ट व्युटिसियन तह एक तालिमका प्रशिक्षार्थीहरुलाई व्यवसाय सञ्चालनका लागि आवश्यक पर्ने औजार वितरण गरिएको हो ।
प्राविधिक शिक्षालयले २०७१ पुसदेखि चैतसम्म सञ्चालन गरेको असिस्टेन्ट व्युटिसियनको तालिम पूरा गरेका २० जनालाई प्रतिव्यक्ति आठ हजार रुपैयाँ बराबरको सामग्री वितरण गरिएको हो । कार्यक्रममा प्राविधिक शिक्षालयका कार्यक्रम संयोजक देवराज बरालले व्युटिसियनका प्रशिक्षार्थीलाई हेयर ड्रायर, हेयर आइरन, ट्रलि, थ्रेडिङ चेयर लगायतका औजार वितरण गरेका हुन् ।
औजार वितरण कार्यक्रममा रोजगार कोषको सचिवालय हेल्भटास नेपालका प्रतिनिधि दुर्गालाल राईले प्रशिक्षार्थीहरुलाई व्यवसाय सञ्चालनका क्रममा सीपसँगै इमान्दार र लगनशील भएर लाग्न आग्रह गरे । उनले अहिलेको प्रतिस्पर्धात्मक समयमा सीपप्रति समर्पित भएर लाग्न सके प्रशिक्षार्थीहरुलाई आफ्नो जीवन सफल बनाउन सजिलो हुने धारणा राखे । कार्यक्रममा शिक्षालयका प्रतिनिधि हरि बरालले तालिमसँगै वितरण गरिएको औजारले प्रशिक्षार्थीलाई व्यवसाय सञ्चालन गर्न सहयोग गर्ने धारणा राखे । उनले संस्थाबाट लिएको सीपलाई रोजगारीमा परिणत गर्न सके जीवनमा खुसीयाली ल्याउन सकिने समेत बताए ।
Comments
Post a Comment