कहाँ गयो स्वाभिमान ?

तस्वीरमा देखिएको भारतीय नम्बर प्लेटको कारमा चढ्दै गरेका व्यक्ति मोरङ क्षेत्र नं. ९ का सभासद डिगबहादुर लिम्बू हुन् । केही समयदेखि आफ्नो निर्वाचन क्षेत्र घुम्ने क्रममा सभासद लिम्बू भारतीय DL8CG/2843 नम्बरको हुन्डाई कम्पनीको कारमा निर्धक्क हिँड्ने गरेका छन् । आइतबार उर्लाबारी-७ स्थित सुनपकुवा उमाविको एक कार्यक्रममा सहभागी हुने क्रममा पनि लिम्बू सोही कारमा सवार थिए ।

उनको यो हर्कत देखेर केही व्यक्तिले तीन दिनअघि सो कारमा मंगलबारेमै ढुंगा प्रहार गरेको पनि खुल्न आएको छ । जसका कारण कारको अगाडिको सिसा चर्किएको प्रष्टै देख्न सकिन्छ । भारतीय नम्बर प्लेटको गाडीमा सभासद जस्तो मुलुकको नीति निर्माण तहमा पुगेका व्यक्ति सवार हुँदा स्थानीय प्रहरी मुकदर्शक बनेको छ । यस विषयमा सभासदसँगै कार्यक्रममा सहभागी भएका इलाका प्रहरी कार्यालय उर्लाबारीका प्रहरी निरीक्षक श्रीराम भण्डारीसँग जिज्ञासा राख्दा उनले कुनै प्रतिकृया दिन चाहेनन्।
शब्द/तस्वीर - मिलन के राउत