दमक।
झापाको दमक १२ स्थित हनुमान मन्दिरनजिकै केही वर्षदेखि फेन्सी कपडाको व्यापार गर्दै आएका भारतको कुचविहार घर बताउने निखिल नाथ लाखौं रुपैयाँ ठगी गरेर फरार भएका छन् ।
४० वर्षीय नाथ विगत पाँच वर्षदेखि सो स्थानमा डेरा बसेर व्यापार गर्दै आएका थिए । उनले दमकस्थित द एभरेस्ट र एकजुट कृषि सहकारी संस्थासहित विभिन्न व्यक्तिसँग सरसापटी स्वरुप ब्याजमा सापटी लिएको लाखौं रुपैयाँ ठगी गरेका बताइएको छ । उनले ठगी गरेको संस्थागत ऋणका आधिकारिक कागजातहरु भए पनि व्यक्तिगत सरसापटी लिएको रकम केकति हो भन्ने यकिन हुन सकेको छैन । तापनि कम्तीमा आठ दश जनाले अहिले तीस लाख रुपैयाँभन्दा बढी रकम आफूहरुबाट लिएर करीब दुई सातादेखि नाथ परिवारसहित सम्पर्कबिहीन भएको बताएका छन् ।
ती व्यक्तिले आफ्नो सहकारीबाट दैनिक किस्ता तिर्ने सर्तमा लिएको ५० हजार रुपैयाँमध्ये ४० हजार रुपैयाँ असुल हुन बाँकी रहेको एकजुट कृषि सहकारी संस्थाका कोषाध्यक्ष भरत अर्यालले जानकारी दिए । अर्यालले भने, 'हाम्रो सहकारीमा मात्रै ४० हजार तिर्न बाँकी देखिएको छ, अरु थुप्रै सर्वसाधारणको पनि रकम लिएर रातारात भागेको छ ।' नाथले सञ्चालन गर्दै आएको पसलमा करीब ५ लाख रुपैयाँ बराबरका सरसामान हुन सक्ने जानकारहरुले बताएका छन् ।
भारतीय नागरिकले यतिधेरै रकम ठगेर भागेपछि पीडित सर्वसाधारण आक्रोसित भएका छन् । उनीहरुले फरार नाथको खोजी गरी पक्राउ गर्न स्थानीय प्रहरी प्रशासनले कदम चाल्नुपर्ने माग पनि गरेका छन् ।
Comments
Post a Comment