आफ्ना एक दिवंगत छात्रको स्मृतिमा झापाको दमक १५ स्थित पाणिनी माविले आज झापा निर्वाचन क्षेत्र ७ स्तरीय अन्तरसामुदायिक विद्यालय स्तरीय हाजिरी जवाफ प्रतियोगिता सम्पन्न गरेको छ ।
प्रतियोगितामा यस क्षेत्रका १० वटा सामुदायिक मावि तथा उच्च माविहरूको सहभागिता रहेको थियो ।
विद्यालयका स्वर्गीय विद्यार्थी भिष्म काफ्लेको पाँचौ स्मृति दिवसका अवसरमा प्रतियोगिताको आयोजना गरिएको हो ।
प्रतियोगितामा आयोजक पाणिनी माविका साथै दमकका सरस्वती उच्च मावि, हिमालय उच्च मावि, ढुकुरपानी उच्च मावि, सिंहदेवी उच्च मावि र पशुपति माविको सहभागिता रहेको थियो भने धरमपुरको भानु मावि, तोपगाछीको कमला मदन आश्रित स्मृति उच्च मावि तथा लखनपुरका मंगलमय उच्च मावि र सरस्वती माविले प्रतियोगितामा सहभागिता जनाएका थिए ।
भिष्म काफ्ले स्मृति छात्रवृत्ति कोषबाट सञ्चालन गरिएको सो प्रतियोगितामा हिमालय उच्च मावि प्रथम, सिंहदेवी उच्च मावि द्वितीय र सरस्वती मावि लखनपुर तृतीय भएको विद्यालयका प्रअ टिकाराम भण्डारीले जानकारी दिएका छन् । भण्डारीका अनुसार प्रतियोगिताका प्रथम, द्वितीय र तृतीय हुने विद्यालयले क्रमसः २ हजार, एक हजार दुई सय र ८ सय रूपैयाँ प्राप्त गरेका छन् ।
सोही कार्यक्रममा विद्यालयका पूर्व शिक्षकहरू प्रेम बहादुर खड्का र सोमनाथ बराललाई प्रशंसापत्र प्रदान गरी सम्मान गरिएको थियो । प्रमुख अतिथिसमेत रहेका दमक नगरपालिकाका कार्यकारी अधिकृत युवराज दहालले शिक्षकद्वय खड्का र बराललाई प्रशंसापत्र प्रदान गरेका थिए ।
यसैगरी सोही कार्यक्रममा विद्यालयमा स्थापित स्वर्गीय हेमदल तामाङ स्मृति कोषका तर्फबाट विद्यालयमा अध्ययनरत विपन्न परिवारका २५ छात्रछात्रालाई स्वेटरसमेत प्रदान गरिएको थियो ।
त्यस्तै गत केही दिनअघि विद्यालयमा सम्पन्न अन्तर सदनात्मक छात्रा फूटवल प्रतियोगिताका विजेता तथा उपविजेता टोलीका छात्राहरूलाईसमेत पदक तथा पुरस्कार प्रदान गरिएको प्रअ भण्डारीले जानकारी दिए ।
कार्यक्रम विद्यालय व्यवस्थापन समितिका अध्यक्ष पर्शुराम रिजालको अध्यक्षता र स्थानीय समाजसेवी तथा विद्यालयका पूर्व शिक्षक अभिभावक संघका अध्यक्ष, अक्षयकोष दाता भवानी दहालको विशेष आतिथ्यतामा सम्पन्न भएको थियो ।
Comments
Post a Comment