सुनसरीका १६ विद्यालयमा अख्तियारद्वारा छानविन, प्रअकै प्रमाणपत्र नक्कली भएको खुलासा

तेज वन विश्वासी, ३१ साउन, सुनसरी। फर्जी विद्यार्थी राखेर विद्यालय सञ्चालन गरेको उजुरी परेपछि सुनसरीका १६ वटा विद्यालयहरुमा अख्तियार दुरुपयोग अनुसन्धान आयोगले छानविन सुरु गरेको छ । सुनसरीको इटहरीबाट ३, धरानबाट ७, हाँसपोसाबाट २ इनरुवाबाट ३ र एकम्बाबाट १ विद्यालय गरी १६ विद्यालयहरु अख्तियारको छानविनमा परेका हुन् । जिल्ला शिक्षा कार्यालय सुनसरीलाई गत साउन १९ गते नै विद्यालयको गतिविधिको विषयमा पत्र काटेर जानकारी गराएपनि अविरल वर्षाका कारण अख्तियारले साउन ३० गतेवाट मात्रै विद्यालयहरुमा छानविनको कार्यक्रमहरु सुरु गरेको थियो । छानविनमा परेका विद्यालयहरुले दिएको विद्यार्थी संख्या र गणना संख्यामा फरक भेटिएपछि अख्तियारले छानविन प्रकृया अगाडि बढाएको जिल्ला शिक्षा कार्यालय सुनसरीका शिक्षा अधिकारी तुलसीनारायण अधिकारीले बताए । छानविनको क्रममा सुनसरीका १६ वटै विद्यालयहरुमा स्पष्टिकरणका लागि पत्र काटिसकेको र आइतवारदेखि बयान लिने कार्यक्रम रहेको अख्तियारका प्रवक्ता श्रीधर सापकोटाले बताए । १६ वटा विद्यालयहरुमध्ये केही विद्यालयहरुसँग स्पष्टिकरणका लागि बयान लिने क्रम जारी रहेको आयोगका प्रवक्ता श्रीधरले बताए । यसैबीच छानविनको क्रममा सुनसरीको हाँसपोसा ४ स्थित श्री पञ्चायत रजत जयन्ती निमाविका प्रधानाध्यापक दिपनारायण साहको शैक्षिक योग्यताको प्रमाणपत्र नक्कली भएको अख्तियारले खुलासा गरेको छ । बढुवा प्रयोजनका लागि प्रधानाध्यापक साहले शिक्षा मन्त्रालयमा पेस गरेको प्रमाणपत्र भारतको बिहारबाट ल्याइएकोले नक्कली पुष्टि भएको अख्तियार दुरुपयोग अनुसन्धानका प्रवक्ता श्रीधरले बताएका छन् । बढुवा प्रयोजनका लागि प्रअ साहले बिहारको पटनास्थित इन्टरमिडियट एजुकेसन काउन्सीलबाट आई ए उत्तीर्ण गरेको प्रमाणपत्र शिक्षा मन्त्रालयमा पेश गरेको अखितयारले जनाएको छ । नक्कली प्रमाणपत्र पेस गर्ने प्रअ साहविरुद्ध शैक्षिक नियमावली अनुसार कानुनी कार्वाही अगाडी बढाइने अख्तियारका प्रवक्ता श्रीधरले बताए ।