विकट गाउँमा वायरलेस इन्टरनेट सेवा

उत्तरी म्याग्दीको विकट बेग गाविसको महादेव माविमा वायरलेस इन्टरनेट सेवा सुरु भएको छ । सन् २००७ को रोमन म्यागासेसे पुरस्कारबाट सम्मानित महावीर पुनको प्रयासमा सो सेवा सुरु भएको हो । 


म्याग्दीका उत्तरी भेगका पाँच वटा विकट गाविसमा यसअघि नै वायरलेस इन्टरनेट सेवा सुरु भइसकेका थिए । इन्टरनेटको सुविधाले गर्दा म्याग्दीको ग्रामीण भेगका मानिसले पनि तुरुन्तै देश विदेशका समाचारहरू थाहा पाउन र विदेशमा रहेका आफन्तहरूसँग कुराकानी गर्न पाएका छन् । वायरलेस प्रविधिमार्फत इन्टरनेट सेवा गाउँगाउँमा पुगेको म्याग्दी पहिलो जिल्ला हो । यहाँका उत्तरी भेगका अधिकांश गाउँमा वायरलेस इन्टरनेट सेवा उपलब्ध छ ।